Keu Bangsa Aceh Meutuah

Meukrue seumangat rahmat meusampe
Rincong meu uke hana le tajam
Yoh masa dile jithe le kafe
Rata sagoe be Aceh ji seugan

Cukop meu ceuhu makmu bukon le
Raja pih ade yang mat pimpinan
Rakyat seujahtra kuta deungon gle
Hana yang mate ngon tan makanan

Seuramoe Meukah meugah bukon le
Rata lungkiek gle na wase tambang
Kareuna Nanggroe bak jaroe jahe
Tuhan peu ade ka Neu cok pulang

Saboh alamat nikmat hana le
Karena jahe hana le so tham
Kareuna Raja ka dua hate
Hukom yang ade hana le timang

Takaleon conto sampoe meupake
Meu poh poh mate seu sabe Islam
Rot noe ngon rot deh areh mat beude
Peuturot hate pakat peu ek prang

Rakyat sengsara rata sagoe be
Han so jeut jak le u gle ngon u blang
Ladom seu numpok kabeh brok pade
Ladom dalam gle kabeh brok kacang

Bak tanggai 16 Agustus akhe
Rumbok Helsingke hanjeut le muprang
Ban dua pihak seureuntak sare
Meu jroh jroh hate hanjeut le dendam
Geutanda jaroe mentro ngon toke
Kateuhah hate RI dendon GAM

Hase M O U nanggroe Helsingke
Di Aceh beude sare ji gudang
Alif Ba goh jeut neuk bet Tapeuse
Rimung goh mate beude dirupang

Laba ngon rugo hana so pike
Peuturot hate ngon nafsu syaitan
Jalo goh leupah beulahdeh ji ile
Goh troh u pante tanyoe jeu meurang

Ka laen macam ragam seu mike
Neuk duk keu toke dalam pikeran
Sumpah ngon janji ka ji peureule
Tan le meu pike keu rakan rakan

Penteng bak jaroe moto B M W
Oh wate mate aleh pakiban
Hana so sangka si janda male Oh ban meulahe aneuk pih agam

Rupa sep ceudah sulah meu uke
Su sinyak lahe mate ma bidan
Sinyak ka rayeuk jak jok u Meuse
Bek jeut keu kafe yu beut Qurâan

Ji beut hana roh gadoh meu jipre
Jijak meu rabe sabe tip malam
Rugo belanja meugunca pade
Peulandok pance ka meu sereuban

Peugah droe Tgk Abu ngon Toke
Ratasago be sare meu utang
Lheuh tapoh buya ngon mata kawe
Singa dalam gle ka ji jeumeurang

Jino lam susah lempah meusampe
Hukom bak hate kon le aturan
Mandum ka teuga dak baro lahe
Mandum ka sabe tanle bawahan
Hana le meuri guci ngon bate

Sama seumike sare keumuran
Yang penteng troe prut pijut hana le
Meu keusut hate katroh tujuan
Meunyoe bak peugah gagah bukon le

Hareuga mate nanggroe cok pulang
Etno keuh haba d'na meu cae
Keu ubat hate mangat pikiran
Yang D'na rawi buketi hana le
Aceh kareule tanle harapan..

post di GERAKAN REVOLUSI ASNLF oleh rinari abeh seula'en go catok dan moto beko